10/04/2013 | Yazar: Erkan Yıldırım

Mi eşnawit ke nêweşxane tirmê Marjane nêdano û serê tirmê aye de xo wayîr vîneno. Coka, ez no nuşte weşanena. Ez bawer kena ke Marjane do no desthelatdarî ver zî sere wedaro.

Mi nêwaştine ke no nuşte neşir bikerê. La mi eşnawit ke nêweşxane tirmê Marjane nêdano û serê tirmê aye de xo wayîr vîneno. Coka, ez no nuşte weşanena. Ez bawer kena ke Marjane do no desthelatdarî ver zî sere wedaro.
 
28.03.2013
Ez nîka reyna rayîr de ya. Welatêk ra vêrena welatê bînî. Vîyartişê nêy welatan mezgê mi beno serê rojanê verînan. Eke heşê mi weş bixebetîyo, ez bawer kena ke do demê terw verînan zî bîyaro mezgê mi. La nê qet heşê mi xo nêşîkeno bipêşêno. Cana ti vana qey xatirayê verînî ênê heşê to. La a game zî mawên êno yew îhtîyacîya to esta çîn a perseno. Xora no bêbext demanê xiraban de êno gî keno mîyanê heşê û xatirayanê mi. Wext vêreno seatî peydîma vazdanê, la qet xatirayek nêna heşê mi ke ez to senîn ana verê çîmanê xo? Mi reya verîne  to kotî û senîn dî? Ma senîn qisey kerd persanê û.s.î çîyan.
 
Wext zî embaze ke xayînan ra yo. Dem esto ti wazenê wa dem sey qile adirî vêro; la qet dem ê gaman de medeyê xo nêxerepneno. Dem esto zî ti vana, demo law yan vindere yan zî êdî şo. Ma tîya çîyek fikrênê. La, nêy no bêbaw û bêbext, ti vanê qey qubale girewto wîna lez lez vêreno. Neyse demî ewro peydima vazdanê û ma ha dî ke ma Qeyserî de yê. Ma nêzana ke ma senîn Enqera ra ameyî Qeyserî.
 
Sey ke gama ez hema nêkewtebîya rayir, planê mi senîn bî mi yew bi yew planê xo ardî ca. Ez şîya şune Qeyserî ASAM(SGDD). Bi ardimê yew cuwamerdî ma xo resna Ercîyes tip fakultesî. Ma lez kerd ke ma şêrê vere hekîmî. Heto ke ez resaya verê hekîmî çi ama serê mi çi nêame. Merdimo ke kesanê bînan nêşinasnayo, her dem bi waştişê fîkrê xo ciwîyêno û kesanê binan zî na gore ra ciwîneno. Nêweşxane de cayê xizmeta ciwakî zî bibê. Ewca de maş î vere yew uzmanê xizmeta cîwakî. La werakna ma nêşîyîne. Merdîm ewca ronîşto tena çay dekeno û a çaya ke dekerde şîmeno. Ez şîya vere ey ma serê xebata xîzmeta cîwakî qîsey kerd, la merdim merde yo ayeya xo xo ra çînîya. Welhasil seba nêweşê x oma nêşkayê ey ra ardim bigêrê. Ma sere çewtî peyder pey şî werê hekîmî. Ewca de mi hekîm het de qîsey kerd. Heta ke mi qisey kerd zerrîya mi mi rab î cîya û welat bi welat lorîna xo ante. Qijînîya zerrîya mi heta ke siltano ker zî bieşnawo pêt vejîya. Ax marjana mi. Ax bêkesa mi. No çi tewro ke ti dekewta ci.
 
A gama heme xatirayê ma huşê mezgê mi kerdî. La mezgê mi wina kelabalixan ra nasî nêbi. Eke ca nêmend mi fehm kerd ke xatirayê ke zêdeyînî bî hesirî û çîmanê mi ra ênê war.  4 mengî veri ci bî. Ma Qeyserî de to naskerdibî. Ma Kaos GL de xebatox bî. Û seba bextwaştoxan ma bajar bi bajar gêrayne. ma eşnawit ke ti nêweş a. Nêweşîya to giran a, na jîyana bêbextine to rê xirabîye kerde bî. Ma O wext seba to mi zaf hesîrî kerdîbî war. La seba ke ti şedinayî bîya û to xo rê neheqî kebul nêkerdine zaf weşê mi şibê. Mi tos ey yew kawa dîbîya. Mi xo zere de vatine: willey eke deste to gîrêdeye nêbîyene, ti do dinya cayê xo ra têbidê.
 
La nika ti nêweş a. To der teqet nêmendo ke ti wirzê vajê ti bi xeyr ameyî. Çîyek nêbeno embaza delale. Çîyek nêbeno mi no nuşto. Gama ti wişta xo ser de, ez heme heyfê nêy ozran to ra gêna. Ti qet meraq meke.
 
Mi kerdine nêkerdine mi dest ra çîyek nêameyîne. Hekîmî qale bi qale wa bestine û vatine: ma wina kerdo, ma wina kenê, la bella tiya dima her çî a dest de yo. Aye bieşko, do wirzo û bixelesîyo. Mi zerreye xo de va; mi ame dîyo, ez aye naskena. Aye do no karî zî bikero. Aye do na zorî ra zî bixelesîyo.
 
02.04.2013
Serê meymantîya mi ra hewteyek nêşiyo embaza delale. Ti kamcîn het r aşina. Meke meşo. Hêvîya ma vindere. Embazê toyê feqîrî to pey ra berbenê. Berîya to kenê. Ti x ora veraya la to înan feqîran ra çi waşt. Ê her roj ameyîne verê to. Înan bawerîya xo to ra nêbirna. Înan waştine ke ti reyna biewnî înan ra.
 
La ez! to mi ra çi wast? Ez seba to qeherîya ya. Mi zerrîya xo de bawerîya ke girde weyî kerde. Mi waştine ke ti bawerîya nêrmakan bimucnê temamê jîyane. La to jîyane xo bedelna. Ti şîya. To qet tîya ra hes zî nêkerd. Xora ti nêbîya? To her dem vatine ez nêweş a. La ez nêwazena tiya de şîfa vînê. Ez merdimanê nêy welatî ra hes nêkena. Gama nêy merdimi anenê mi ra, ti wanê qey were kene ke ez nika tîya de geber bibê, bimrê. Rasta merdime nêy welatî qet merdimatî ra fehm nêkenê. Ez zî na weş zana. La bizane kî nêy welatî de merdimê ke sey ma zî estê. Nêy merdimi herdem rayîrê to pawenê.
 
Embaza marjane rayîrê to herdem akerde û roşin bo. Ma to ra yew çîye wazenê. Ti her çaya se, ma qet xo vîrî ra meke.
 
Tîya ra seba to hezar silamî

Etiketler:
nefret